A yayin wata ganawa da manema labarai bayan kammala wani taron gaggawa akan sha’anin tsaro, sakataren gwamnatin jihar ta Bauchi Alhaji Sabiu Baba, ya ce an lura da kwararowar wasu bakin fuskoki a yankunan kananan hukumomin jihar.

Baba ya ce abin da ya faru a Geidam, ya yi sanadiyyar shigowar jama’a da dama daga jihar Yobe, domin kuwa jihar ta Bauchi tana makwabtaka da Yobe a kananan hukumomi 4 na Zaki, Dambam, Darazo da Gamawa.

Gov Bala Muh'd

Gov Bala Muh’d

Ko baya ga barazana a sha’anin tsaro sakamakon shigowar ‘yan kungiyar ta Boko Haram, sakataren gwamnatin yace kwararowar ‘yan gudun hijira daga jihar Yobe sakamakon hare-haren kungiyar, shi ma kan iya haifar da wani kalubale ga tattalin arzikin jihar ta Bauchi.

To sai dai ya ce gwamnati tana tattaunawa da hukumomin tsaro da masu ruwa da tsaki a sha’anin tsaro, domin samar da maslaha da dakile ayukan ta’addaci kafin su yadu a jihar.